Google Translate heet ‘t Limbörgs es nui taol touwgeveug. De neuraole machienevertaoldeens vaan Google, dee vaanaof vendaog mie es 200 taole oondersteunt, kint noe ouch tekste, documinte en website vaan en nao ‘t Limbörgs umzètte. D’n update mèt de nui versie boe ‘t Limbörgs is touwgeveug geit woersjijnelek donderdag in de naomiddag live.
Tekste in versjèllende variante vaan ‘t Limbörgs kinne in Google Translate nao aander taole weure euvergezat. Bij vertaolinge vaanoet aander taole nao ‘t Limbörgs weurt veural de Mestreechse variant gebruuk. Dees vertaolde tekste vertuine spellingsvariatie en hawwe neet ummertouw de 2003 Spelling veur de Limbörgse Dialekte aon. Google heet ‘n eige taolmodel veur ‘t Limbörgs oontwikkeld. De Limbörgse Academie hoop bij te drage aon euverheidsbeleid veur ‘n officieel spelling en de digitaolisering vaan de taol, zoetot ‘t Limbörgs in al zien riekdom in digitaol taolprodukte besjikbaar kump.
Google Translate heet es doel um bij umzèttinge vaan beveurbeeld Japans of Spaons nao Limbörgs veural de essentie vaan ‘nen teks trök te geve. De vertaolinge vaan Google Translate prittendere neet um zoe perceis wie ‘n minseleke vertaoling te zien.
Dees investeringe koume op e momint boe-op de provincie Limbörg oonderzeuk of zie veur ‘t Limbörgs, zjus wie veur Fries en Papiaments, ‘nen aonvraog veur Deil III staotus oonder ‘t Europees Handves wèlt indene. Yuri Michielsen, veurzitter vaan de Limbörgse Academie: “Väöl taol- en maotsjappeleke organisaties en IT bedrieve wèlle veuroet mèt de taol. De Limbörgse Academie hoop tot de Limbörgse euverheid dit naojaor beslut um Deil III erkinning aon te vraoge en zoe same serieus aon ‘t behaajd en de wijer (digitaol) oontwikkeling vaan ‘t Limbörgs te wèrke.”
De Limbörgse Academie lobbyt en lievert input bij IT bedrieve wie Google um ‘t Limbörgs in hun IT produkte op te numme. Bij Microsoft SwiftKey en Google Gboard heet de Limbörgse Academie al mèt deveur gezörg tot ‘t Limburgs is touwgeveug aon hun Android mobiel toetseborde. Ouch Meta, ‘t moojerbedrief vaan oonder mie Facebook, Instagram, Threads en WhatsApp, wèrk mominteel aon e Limbörgs taolcorpus.
