Ope breef aon partije
In d’n aonloup nao de gemeinteraodsverkezinge vaan 2026 rope Veldeke Krink Mestreech en de Limbörgse Academie de Mestreechse polletiek partije op um ‘t Mestreechs en aander Limbörgs ‘n plaots te geve in hun verkezingsprograms. In ‘ne gezaomeleken ope breef oonderstriepe de organisaties tot ‘t Mestreechs neet allein e levend stök cultureel erfgood is, meh ouch e sociaol bindmiddel wat bijdreug aon identiteit, samehaank en de lokaol economie. Zie doen concrete suggesties veur e gemeintelek taolbeleid – vaan twietaolege straotnaomborde en oonderwiesprojekte tot oondersteuning in de media en ‘nen taolambteneer. De breef is ‘n oetnudeging tot samewèrking:
Ope breef “Mestreech(s) verbint!”
Geachden hier, geachde mevrouw,
Mestreech is gruuts op häör historie, eigeheid en taol. ’t Mestreechs (en aander Limbörgs) is mie es ’n meneer vaan spreke. ‘t Is e levend stök erfgood wat lui verbint – vaan joonk tot aajd – en veur väöl ‘n daogeleks communicatiemiddel vörmp, wat bijdreug aon de sociaole samenhaank in eus stad. Toch is ‘t Mestreechs nog te weineg ziechbaar in ‘t publieke leve en in ‘t gemeintebeleid. Dat kin én maag beter.
Taolbeleid wèrk – gemeintes make ‘t versjèl
’t Mestreechs maak deil oet vaan de Limbörgse taol, die erkend is oonder ‘t Europees Handvest veur regionaol taole en taole vaan minderhede. Oonderzeuk tuint aon tot effectief taolbeleid wèrk, zeker es ‘t gedrage weurt door gezinne, oonderwies én euverheid. Gemeintes speule hei-in ‘n sleutelrol. Taolbeleid versterk neet allein eus culturele identiteit, meh dreug ouch bij aon social cohesie en ‘n sterker lokaol economie.
Vaan vrijwèllegers nao structureel beleid mèt impact
Vrijwèllegersorganisaties wie Veldeke Krink Mestreech en de Limbörgse Academie zètte ziech al jaorelaank in veur ‘t behaajd en de promotie vaan ‘t Mestreechs. Mer um éch versjèl te make is ‘ne wijere stap nudeg: vaan vrijwilligerswèrk nao structureel gemeintelek taolbeleid. Eur partij kint dee stap meugelek make.
Veer rope uuch daorum op um aandach veur ‘t Mestreechs (en ander Limbörgs) op te numme in eur verkezingsprogram veur 2026. Hei-oonder e paar suggesties – gein oetpöttende lies, meh aonknuippunte um same wijer te verkinne. Eige ideeje vaan eur partij zien zeker ouch zier welkom en veer dinke gere mèt uuch mèt euver hun invölling. Daoneve is de aonstèlling vaan ‘nen taolambteneer en de formalisering vaan taolbeleid in regelgeving essentieel veur de structureel veraankering vaan de taol in eus sameleving.
Meugeleke maotregele um ’t Mestreechs (en ’t Limbörgs) te versterke:
1. Ziechbaarheid in de stad
- Twietaolege straotnaomborde en beweegwijzering op mie plaotse.
- Culturele eveneminte (deils) in ’t Mestreechs stimulere via subsidies.
2. Gebruuk vaan ‘t Mestreechs in de gemeinteleke communicatie
- Bördsjes bij lokètte: “Hei kinste ouch Mestreechs (Limburgs) praote”.
- Twietaolege campagnes, informatieveurzening, websites en openbaar signaolering.
3. Oondersteuning in kinderopvaank en oonderwies
- Aofsprake euver ‘t Mestreechs es lèstaol in de kinderopvaank.
- Projekte en lèsaonbod in ‘t Mestreechs op sjaole stimulere.
- Gratis taollèsse veur nui Mestreechtenere – es werm welkom in Mestreech.
- Veurliechting aon awwers euver de mieweerde vaan ’t Mestreechs es thoes- en opveujtaol.
- ‘ne Mestreechse geboortekedo bij aongifte vaan geboorte.
4. Stimulering vaan Mestreechs in de lokaol media
- Lokaol umrope en media oondersteune bij Mestreechstaolege content.
5. Verbinding in de raod
- ‘ne Korte (gratis) introductiecursus Maastrichts veur raodsleie – good veur de verbinding oonderein én e sterk signaol nao de stad.
Mestreech(s) verbint!
Same kinne veer Mestreech nog beter verbinde via häör eige taol. Veer goon gere in gesprek mèt eur partij um dees en aander veurstèlle wijer oet te wèrke. Höb geer vraoge, of wèlt geer ’n aofspraok make? Nump daan gerös kontak mèt us op.
Mèt de vrunteleke compleminte,
Yuri Michielsen
veurzitter Limbörgse Academie
yuri@limburgs.org
Carlo Schrijnemaekers
voorzitter Veldeke Krink Mestreech
veurzitter@veldekemestreech.nl
