‘t ‘Visie- en realiseringsdocumint Limbörgse Taol’ (‘Visie- en realiseringsdocument Limburgse Taal’) gief iers achtergroondinformatie euver ‘t Limbörg en besprik daonao de juridische aspekte vaan de regionaol taol en de rol vaan de provinciaol euverheid. Allewel ‘t Limbörgs in 1997 erkind is gewore oonder ‘t Europese Handves veur regionaol taole of taole vaan minderhede (Handves) is wieneg actief taolbeleid geïmplementeerd. De verantwoordelekheid veur taolbeleid is door de nationaol euverheid groetendeils aofgesjuif nao de provincie, allewel de nationaol regering op groond vaan ‘t internationaol rech verantwoordelek blijf.
‘t Documint benaodrök tot de provincie Limbörg, meugelek in samewèrking mèt gemeintes, actief taolbeleid kint veure, ouch zoonder steun vaan de nationaol euverheid. Dao weure twie beleidsspore veurgestèld: ierstens, ‘t gebruuk vaan bestaonde regelgevende bevooghede door de provincie en de gemeinte; en twiedens, concrete acties op versjèllende gebede wie oonderwies, media en cultuur. Digitaol infrastructuur en bekans budgètneutraol initiatieve weure veurgestèld um de Limbörgse taol te normalisere en breid te kinne gebruke.
Dit documint is in ‘t Nederlands.
