Speulentere Mestreechs liere sjrieve?
Dat kin vaanaof dees week mèt de foonkelnuien app Speulentere Spelle! Op vriedag 17 jannewarie weurt dezen innovatieven app vaan de Limbörgse Academie en Veldeke Krink Mestreech officieel gelanceerd.
Spelle weurt e speul: ‘roojem’, ‘zjeniaol’ en mie
Speulentere Spelle beujt gebrukers ‘n unieke lierervaring via e speul mèt vief niveaus en aofsletend ‘n Groete Indtoets. D’n app is veur beginnende sjrijvers en experts vaan de Mestreechter Taol. In eder niveau weure kernaspekte vaan de Limbörgse spelling veur ‘t dialek vaan Mestreech kort oetgelag en touwgepas mèt interactief späölselkes. Typisch Mestreechse wäörd wie ‘roojem’, ‘zjeniaol’ en ‘pumpele’ zörge daobij veur ‘nen herkinbare en späölsen insteek. D’n app is gratis besjikbaar veur zoewel Android– es Apple-gebrukers.
‘ne Belaankrieke stap veur de Limbörgse taol
Regionaol taole wie ‘t Limbörgs stoon mie en mie in de belaankstèlling. Zie drage neet allein bij aon ‘t cultureel erfgood, meh versterke ouch de regionaol identiteit. “Mèt dezen app zètte veer ‘ne belaankrieke stap veur ‘t behaajd en de promotie vaan eus taol. Door digitaol technologie en gamificatie in te zètte, make veer ‘t liere sjrieve devaan aontrèkkeleker veur joonk en aajd,” zoe Carlo Schrijnemaekers, veurzitter vaan Veldeke Krink Mestreech, en Yuri Michielsen, veurzitter vaan de Limbörgse Academie.
Meugelekhede veur aander dialekte
Speulentere Spelle is tot stand gekoume in opdrach vaan de gemeinte Mestreech. D’n techniek is oontwikkeld door ‘t Mestreechs bedrief Goal043. De technologie en liermethodiek achter d’n app zien zoe ineingezat tot ze in de touwkoms ouch touwgepas kinne weure op aander dialekte vaan ‘t Limbörgs.
Officieel lancering en besjikbaarheid
D’n app weurt op vriedag 17 jannewarie um 16.00 oor officieel gelanceerd mèt ‘n klein, beslote bijeinkoms in Centre Céramique. Vaanaof 18 jannewarie is Speulentere Spelle veur ederein te downloade via de App en Play Stores. Mie informatie kint g’r vinde op www.speulenterespelle.nl
