Oetlègk

Hei-oonder vint G’r ’nen oetlègk veur wie-t G’r wäörd en eventueel citaote en oetdrökkinge kint oetzeuke en aon eus Limbörgse lies vaan wäörd kint touwveuge. Es G’r nog neet bij us aongemeld zeet, duit hei veur Uuch iers aon te melle. En veur wijer vraoge kint G’r ummertouw kontak mèt us opnumme.

1. Veurtot G’r gaot leze:
1. Es Geer veurhöb e Limbörgstaoleg werk te leze, nump iers kontak mèt us op veur te zien of dit nog neet geleze is én veur de code veur de Gebruuksaonteikeninge. Dees code höb G’r nudeg es G’r de wäörd vaan dat werk gaot touwveuge aon eus lies vaan Limbörgse wäörd.

2. Oonder ’t leze:
1. Lees ’t werk en haolt wäörd, citaote en oetdrökkinge droet.
a. Wäörd: Eder woord wat Uuch es bizunder veurkump. Es veer dat woord al höbbe, daan weurt dat aongegeve es G’r dat woord wèlt inveure.
(veurbeelde: wegpietsje óf sjijf)
b. Citaote: Es Geer vint tot e woord op ’n bizunder meneer in ’ne zin gebruuk weurt óf dee zin ’n definitie gief vaan ’t woord, gef G’r bij dat woord ouch dee zin es citaot.
(veurbeelde: ich pietsj aeve e träöntje weg óf op ‘ne computer zit ’n hel sjijf um bestande op te sloon)
c. Oetdrökkinge: spreekwäörd en gezègkdes
(veurbeeld: zoe döl wie e kuke)
2. Umcirkelt Uuch dees wäörd en citaote of oetdrökkingen in d’n teks of sjrief ze Uuch op mèt de paginanómmers debij veur es G’r mèt leze veerdig zeet en ze gaot inveure.

3. Wäörd touwveuge aon de lies vaan Limbörgse wäörd:
A. Inlogge:
1. Duit: Login (knóp rechsbove)
2. Völt in: username en password
3. Duit: knóp Inlogge (knóp oonder password)
4. Duit: Inhaajd sjaffe (oonderaon linkerbalk)
5. Duit: Woord (oonder Inhaajd sjaffe)

B. Invölle:
1. Verpliech: kees bij Dictionair de meugelikheid Limbörgs – Hollands
2. Verpliech: völt in Trefwoord
Dit is ’t woord wie dat in de gesjreven teks veurkump, mèt de spelling zoe wie in deen teks.
(veurbeeld: wegpietsje)
3. Verpliech: völt in Euverzètting
Es 't gein euverzètting gief of G'r wèt de vertaoling neet, völt hei gewoen 't trefwoord in.
4. Verpliech: völt in Gebruuksaonteikeninge plus paginanómmer
Dit is de code die-t G'r bij 't book gekregen höb veurtot G'r mèt leze begós zeet.
(veurbeeld: Rapaille, Sjweitberg, 1999, 62)
NB es e citaot debij kump, daan moot dat drachter gezat weure
(veurbeeld: Rapaille, Sjweitberg, 1999, 62: ich pietsj aeve e träöntje weg)
5. Völt in: Gezègkdes
(veurbeeld: zoe döl wie e kuke)
6. Duit: Iers beloere veur te zien of G’r al riechtig höb ingevöld
7. Duit: Mie Touwveuge es G’r mie wäörd wèlt touwveuge óf Touwveuge es G’r veerdig zeet.
8. Es G’r gans veerdig zeet, duit Oetlogge (linkerbalk).