Euver Limbörg

Limbörg kraog häöre naom wie ’t ein vaan de provincies vaan ’t Vereinig Keuninkriek vaan de Nederlande woort. Daoveur bestoont Limbörg ouch al, meh oonder versjèllende naome en staotkundige umstandeghede. Es provincie vaan ’t Vereineg Keuninkriek bestoont Limbörg veur d’n doer vaan dat keuninkriek vaan 1815 tot 1839. Wie de Belzje en de Limbörgers tege de absolutistische heersjappij vaan d’n Hollandse Keuning Wöllem d’n Ierste in verzèt kaome, woort Oos-Limbörg, mèt Mestreech es hoofstad oonder Hollandse euverheersjappij gezat. ’t Westelik deil vaan Limbörg kaom oonder Belzje euverheersjappij mèt de nui hoofstad Hasselt.

Oos-Limbörg is sins 1839 de meis zuielike provincie in Nederland en heet ’n zier distinctief karakter. Zie bevint z’ch in ’t zuid-oostelik deil vaan Nederland, veurnaomelik oostelik vaan de revier Maos. De huidstad Mestreech weurt gesjeie door de Maos. Oos-Limbörg grens aon Wes-Limbörg in ’t weste, Frans-kallend Belsj en de Limbörgs-kallende Voerstreek in ’t zuie, Duitsland in ’t ooste en aander Nederlandse provincies in ’t noorde. De sociaol-economische trends, die de provincie in de aofgeloupe decennia beïnvlood höbbe, bróchte e perces vaan verandering en vernuiing op gank, woedoor de naodeile vaan de randlocatie in de nationaol staot in de natuurlike veurdeile vaan häör Europese locatie umgezat zien gewore.

Wes-Limbörg is de meis oostelike provincie vaan Vlaondere, wat ein vaan de drei administratief regio’s op ’t Belsj is. Wes-Limbörg bevint z’ch westelik vaan de revier Maos. In ‘t ooste grens de provincie aon Oos-Limbörg, mèt Nederland in ’t noorde en de Belsj provincies vaan Luik in ‘t zuie en Vlaoms-Braoband en Antwerpe in ‘t weste. De hoofstad Hasselt is in ‘t westelik deil vaan de provincie. De mie oostelik gelege stad Gènk is ein vaan de economische centra. ‘t Veurnaomste oonderwiescentrum, de Universiteit vaan Hasselt in Diepenbeek heet e samewèrkingsverband mèt de belankriekste universiteit vaan Oos-Limbörg in Mestreech aongegange, boemèt de transnational University Limburg (tUL) gestiech is gewore.

Boete de ben vaan spraok, historie en cultuur gief ‘t väöl gemeinsjappelikhede die de Limbörge biejeinbint. Oetsletend tösse de twie Limbörge weurt ‘ne charter veurbereid genaomp “Oos Wes, Limbörg Bès“. Dee charter moot de gemeinsjappelike Limbörgse weerdes en kwalliteite oetdrökke en e raomwerk beje veur gezaomelike projekte, die veur alletwie de deile vaan Limbörg vaan hoeg importantie zien.
Oos- en Wes-Limbörg oonderzeuke de meugelikhede veur same te goon door verdeping vaan de samewèrking op väöl belumpsterreine. In 2008 höbbe de gouverneurs vaan de twie provincies hun intentie geannonceerd veur nao de creatie vaan ‘n groet-Limbörgse regio touw te wèrke, veur zoe de historische verdaoling vaan de nationaol en polletieke sjeiing vaan de regio good te make.

De Euregio Maos-Rien is ’n organisatie boe-in de twie Limbörge samewèrke mèt de Belsj provincie Luik, de kreits Aoke op ’t Prusisch en de veurmaolig Duitse kantons op ’t Belsj. Same mèt dees partners is ouch ‘n samewèrking opgezat gewore veur de Technological Top Region Europe (TTR Euregion) te sjaffe. Op gelieke leis en veur de grenseuvertrèkkende criminaoliteit tege te goon, participere de twie Limbörge mèt hun Euregiopartners in ’t Justitiebureau Internationale Samenwerking (JIS).

Mèt de touwnummende Europese integratie zeuk Limbörg nao ’n verdeping vaan de inter-Limbörgse samewèrking, zoe wie de verbindinge te herlègke mèt zien historische partners in de Maos-Rien regio.