Bestuursleie
Yuri Michielsen-TallmanYuri Michielsen – Tallman is veurzitter vaan de Stiechting Limbörgse Academie. Heer is in Limbörg gebore gewore en mominteel woenechtig in San Francisco. Dr. Michielsen – Tallman is in 1998 aofgestudeerd aon de European Law School vaan de Universiteit Mestreech. Oonder zien rechtestudie doog ’r mèt aon de 1996/1997 European Law Moot Court, woe heer oondersjeiinge kraog es lid vaan ’t Winning Team en Best Speaker. Nao zien stage bij de Juridischen Deens vaan de Europese Kemissie is heer in 2000 mèt ’n Fulbright-bäörs aofgestudeerd bij ’t LL.M program vaan Harvard Law School. In 2004 is ’r cum laude gepromoveerd bij de Universiteit Mestreech. Zie proofsjrif The Nazification and Denazification of the Courts in Belgium, Luxembourg and the Netherlands woort door de Maastricht University Press oetgegeve. Veur zie proofsjrif waor heer in 2005 genomineerd veur de Max van der Stoel – minserechtepries en häöm woorte verliend de Praemium Erasmianum veur oonderzeukers in 2005 en d’n SNS-Pries in 2006. In 2008 heet Dr. Michielsen-Tallman ’t diploom vaan de Liergank Limburgs gehaold, dee door Veldeke Limburg en de provincie Oos-Limbörg gegeve woort. Stuart LaRosaStuart LaRosa is vice-veurzitter vaan de Stiechting Limbörgse Academie. Heer is taolkundige, gevestig in San Francisco, en opgeleid in de formeel en touwgepasde spraokkunde. Zien lankdorende intrèsse in de polletiek roontelum minderheidsspraoke geit trök tot 1999, wie heer zien thesis euver d’n oersprunk vaan ’t cattelaonisme (Raíces del catalanismo) gesjreve heet, boe-veur heer de hoegste distinctie vaan de in Genève gevestigde International Baccalaureate Organisation touwgekind kraog. In 2003 studeerde heer magna cum laude vaan de University of Florida aof veur ziene Bachelor of Arts mèt es huidriechtinge Linguïstiek, Spaons en Frans. ’ne Master of Arts in de spraokkunde haolde heer in 2005 aon de University of California in Santa Cruz. Zien studieriechtinge waore dao de formeel aspekte vaan syntaxis, semantiek en klanklier, wat veurde tot zien thesis Cluster Simplification and Sonorant Alternations in Catalan. Mominteel is d’n hier LaRosa wèrkzaom es Senior Discourse Analyst bij H5 San Francisco.